मेरो किल्लामा - केशर थुलुङ

हुन त

मेरो किल्लामा

तिमीलाई स्वागत गर्ने

मेरो ध्येय थिएन

आइहाल्यौ महाशयः

स्वागत छ

तर कदमकदाचित नसोच्नु

मेरो किल्ला

तिमीले सोचेकोजस्तो एकरत्ति छैन

जहाँ अधिनायक बन्न पाइन्छ

जहाँ साम्राज्यवादी बन्न पाइन्छ

हो मात्र म थिएँ हिजोसम्म

आजदेखि तिमी पनि आएका छौ

र यो किल्ला

तिम्रो, मेरो भएको छ

गर्न खोज्दा-खोज्दा

विफल भएका थिए

थुप्र्र्रै मेरो प्रयासहरु

जुट्दा-जुट्दा

कैयौँ पटक हारेका थिए

थुप्रै मेरो आकांक्षाहरु

फेरि अलिकति भए पनि

तिम्रो आगमनले

ममा छुट्टै साहस बढेको छ

त्यसैले अब

तिमी र म मिलेर

यो किल्लामा

एउटा छुट्टै

सुगम अध्यायको निर्माण गर्नुपर्छ

तिम्रो, मेरो लागि नभए पनि

भावी हाम्रा सन्ततिका निम्ति ।